An-Nazi'at( النازعات)
Original,King Fahad Quran Complex(الأصلي,مجمع الملك فهد القرآن)
show/hide
Tahir ul Qadri(طاہر القادری)
show/hide
بِسمِ اللَّهِ الرَّحمٰنِ الرَّحيمِ وَالنّٰزِعٰتِ غَرقًا(1)
ان (فرشتوں) کی قَسم جو (کافروں کی جان ان کے جسموں کے ایک ایک انگ میں سے) نہایت سختی سے کھینچ لاتے ہیں۔ (یا:- توانائی کی ان لہروں کی قَسم جو مادہ کے اندر گھس کر کیمیائی جوڑوں کو سختی سے توڑ پھوڑ دیتی ہیں)،(1)
وَالنّٰشِطٰتِ نَشطًا(2)
اور ان (فرشتوں) کی قَسم جو (مومنوں کی جان کے) بند نہایت نرمی سے کھول دیتے ہیں۔ (یا:- توانائی کی ان لہروں کی قَسم جو مادہ کے اندر سے کیمیائی جوڑوں کو نہایت نرمی اور آرام سے توڑ دیتی ہیں)،(2)
وَالسّٰبِحٰتِ سَبحًا(3)
اور ان (فرشتوں) کی قَسم جو (زمین و آسمان کے درمیان) تیزی سے تیرتے پھرتے ہیں۔ (یا:- توانائی کی ان لہروں کی قَسم جو آسمانی خلا و فضا میں بلا روک ٹوک چلتی پھرتی ہیں)،(3)
فَالسّٰبِقٰتِ سَبقًا(4)
پھر ان (فرشتوں) کی قَسم جو لپک کر (دوسروں سے) آگے بڑھ جاتے ہیں۔ (یا:- پھر توانائی کی ان لہروں کی قَسم جو رفتار، طاقت اور جاذبیت کے لحاظ سے دوسری لہروں پر سبقت لے جاتی ہیں)،(4)
فَالمُدَبِّرٰتِ أَمرًا(5)
پھر ان (فرشتوں) کی قَسم جو مختلف اُمور کی تدبیر کرتے ہیں۔ (یا:- پھر توانائی کی ان لہروں کی قَسم جو باہمی تعامل سے کائناتی نظام کی بقا کے لئے توازن و تدبیر قائم رکھتی ہیں)،(5)
يَومَ تَرجُفُ الرّاجِفَةُ(6)
(جب انہیں اس نظامِ کائنات کے درہم برہم کردینے کا حکم ہوگا تو) اس دن (کائنات کی) ہر متحرک چیز شدید حرکت میں آجائے گی،(6)
تَتبَعُهَا الرّادِفَةُ(7)
پیچھے آنے والا ایک اور زلزلہ اس کے پیچھے آئے گا،(7)
قُلوبٌ يَومَئِذٍ واجِفَةٌ(8)
اس دن (لوگوں کے) دل خوف و اضطراب سے دھڑکتے ہوں گے،(8)
أَبصٰرُها خٰشِعَةٌ(9)
ان کی آنکھیں (خوف و ہیبت سے) جھکی ہوں گی،(9)
يَقولونَ أَءِنّا لَمَردودونَ فِى الحافِرَةِ(10)
(کفّار) کہتے ہیں: کیا ہم پہلی زندگی کی طرف پلٹائے جائیں گے،(10)
أَءِذا كُنّا عِظٰمًا نَخِرَةً(11)
کیا جب ہم بوسیدہ (کھوکھلی) ہڈیاں ہو جائیں گے (تب بھی زندہ کیے جائیں گے)،(11)
قالوا تِلكَ إِذًا كَرَّةٌ خاسِرَةٌ(12)
وہ کہتے ہیں: یہ (لوٹنا) تو اس وقت بڑے خسارے کا لوٹنا ہوگا،(12)
فَإِنَّما هِىَ زَجرَةٌ وٰحِدَةٌ(13)
پھر تو یہ ایک ہی بار شدید ہیبت ناک آواز کے ساتھ (کائنات کے تمام اَجرام کا) پھٹ جانا ہوگا،(13)
فَإِذا هُم بِالسّاهِرَةِ(14)
پھر وہ (سب لوگ) یکایک کھلے میدانِ (حشر) میں آموجود ہوں گے،(14)
هَل أَتىٰكَ حَديثُ موسىٰ(15)
کیا آپ کے پاس موسٰی (علیہ السلام) کی خبر پہنچی ہے،(15)
إِذ نادىٰهُ رَبُّهُ بِالوادِ المُقَدَّسِ طُوًى(16)
جب ان کے رب نے طوٰی کی مقدّس وادی میں انہیں پکارا تھا،(16)
اذهَب إِلىٰ فِرعَونَ إِنَّهُ طَغىٰ(17)
(اور حکم دیا تھا کہ) فرعون کے پاس جاؤ وہ سرکش ہو گیا ہے،(17)
فَقُل هَل لَكَ إِلىٰ أَن تَزَكّىٰ(18)
پھر (اس سے) کہو: کیا تیری خواہش ہے کہ تو پاک ہو جائے،(18)
وَأَهدِيَكَ إِلىٰ رَبِّكَ فَتَخشىٰ(19)
اور (کیا تو چاہتا ہے کہ) میں تیرے رب کی طرف تیری رہنمائی کروں تاکہ تو (اس سے) ڈرنے لگے،(19)
فَأَرىٰهُ الءايَةَ الكُبرىٰ(20)
پھر موسٰی (علیہ السلام) نے اسے بڑی نشانی دکھائی،(20)
فَكَذَّبَ وَعَصىٰ(21)
تو اس نے جھٹلا دیا اور نافرمانی کی،(21)
ثُمَّ أَدبَرَ يَسعىٰ(22)
پھر وہ (حق سے) رُوگرداں ہو کر (موسٰی علیہ السلام کی مخالفت میں) سعی و کاوش کرنے لگا،(22)
فَحَشَرَ فَنادىٰ(23)
پھر اس نے (لوگوں کو) جمع کیا اور پکارنے لگا،(23)
فَقالَ أَنا۠ رَبُّكُمُ الأَعلىٰ(24)
پھر اس نے کہا: میں تمہارا سب سے بلند و بالا رب ہوں،(24)
فَأَخَذَهُ اللَّهُ نَكالَ الءاخِرَةِ وَالأولىٰ(25)
تو اللہ نے اسے آخرت اور دنیا کی (دوہری) سزا میں پکڑ لیا،(25)
إِنَّ فى ذٰلِكَ لَعِبرَةً لِمَن يَخشىٰ(26)
بیشک اس (واقعہ) میں اس شخص کے لئے بڑی عبرت ہے جو (اللہ سے) ڈرتا ہے،(26)
ءَأَنتُم أَشَدُّ خَلقًا أَمِ السَّماءُ ۚ بَنىٰها(27)
کیا تمہارا پیدا کرنا زیادہ مشکل ہے یا (پوری) سماوی کائنات کا، جسے اس نے بنایا،(27)
رَفَعَ سَمكَها فَسَوّىٰها(28)
اس نے آسمان کے تمام کرّوں (ستاروں) کو (فضائے بسیط میں پیدا کر کے) بلند کیا، پھر ان (کی ترکیب و تشکیل اور افعال و حرکات) میں اعتدال، توازن اور استحکام پیدا کر دیا،(28)
وَأَغطَشَ لَيلَها وَأَخرَجَ ضُحىٰها(29)
اور اُسی نے آسمانی خلا کی رات کو (یعنی سارے خلائی ماحول کو مثلِ شب) تاریک بنایا، اور (اِس خلا سے) ان (ستاروں) کی روشنی (پیدا کر کے) نکالی،(29)
وَالأَرضَ بَعدَ ذٰلِكَ دَحىٰها(30)
اور اُسی نے زمین کو اِس (ستارے: سورج کے وجود میں آجانے) کے بعد (اِس سے) الگ کر کے زور سے پھینک دیا (اور اِسے قابلِ رہائش بنانے کے لئے بچھا دیا)،(30)
أَخرَجَ مِنها ماءَها وَمَرعىٰها(31)
اسی نے زمین میں سے اس کا پانی (الگ) نکال لیا اور (بقیہ خشک قطعات میں) اس کی نباتات نکالیں،(31)
وَالجِبالَ أَرسىٰها(32)
اور اسی نے (بعض مادوں کو باہم ملا کر) زمین سے محکم پہاڑوں کو ابھار دیا،(32)
مَتٰعًا لَكُم وَلِأَنعٰمِكُم(33)
(یہ سب کچھ) تمہارے اور تمہارے چوپایوں کے فائدہ کے لئے (کیا)،(33)
فَإِذا جاءَتِ الطّامَّةُ الكُبرىٰ(34)
پھر اس وقت (کائنات کے) بڑھتے بڑھتے (اس کی انتہا پر) ہر چیز پر غالب آجانے والی بہت سخت آفتِ (قیامت) آئے گی،(34)
يَومَ يَتَذَكَّرُ الإِنسٰنُ ما سَعىٰ(35)
اُس دن انسان اپنی (ہر) کوشش و عمل کو یاد کرے گا،(35)
وَبُرِّزَتِ الجَحيمُ لِمَن يَرىٰ(36)
اور ہر دیکھنے والے کے لئے دوزخ ظاہر کر دی جائے گی،(36)
فَأَمّا مَن طَغىٰ(37)
پھر جس شخص نے سرکشی کی ہوگی،(37)
وَءاثَرَ الحَيوٰةَ الدُّنيا(38)
اور دنیاوی زندگی کو (آخرت پر) ترجیح دی ہوگی،(38)
فَإِنَّ الجَحيمَ هِىَ المَأوىٰ(39)
تو بیشک دوزخ ہی (اُس کا) ٹھکانا ہوگا،(39)
وَأَمّا مَن خافَ مَقامَ رَبِّهِ وَنَهَى النَّفسَ عَنِ الهَوىٰ(40)
اور جو شخص اپنے رب کے حضور کھڑا ہونے سے ڈرتا رہا اور اُس نے (اپنے) نفس کو (بری) خواہشات و شہوات سے باز رکھا،(40)
فَإِنَّ الجَنَّةَ هِىَ المَأوىٰ(41)
تو بیشک جنت ہی (اُس کا) ٹھکانا ہوگا،(41)
يَسـَٔلونَكَ عَنِ السّاعَةِ أَيّانَ مُرسىٰها(42)
(کفّار) آپ سے قیامت کے بارے میں پوچھتے ہیں کہ اس کا وقوع کب ہوگا،(42)
فيمَ أَنتَ مِن ذِكرىٰها(43)
تو آپ کو اس کے (وقت کے) ذکر سے کیا غرض،(43)
إِلىٰ رَبِّكَ مُنتَهىٰها(44)
اس کی انتہا تو آپ کے رب تک ہے (یعنی ابتداء کی طرح انتہاء میں بھی صرف وحدت رہ جائے گی)،(44)
إِنَّما أَنتَ مُنذِرُ مَن يَخشىٰها(45)
آپ تو محض اس شخص کو ڈر سنانے والے ہیں جو اس سے خائف ہے،(45)
كَأَنَّهُم يَومَ يَرَونَها لَم يَلبَثوا إِلّا عَشِيَّةً أَو ضُحىٰها(46)
گویا وہ جس دن اسے دیکھ لیں گے تو (یہ خیال کریں گے کہ) وہ (دنیا میں) ایک شام یا اس کی صبح کے سوا ٹھہرے ہی نہ تھے،(46)